Fríðunn Jacobsen, heilsufrøðingur á skúlaøkinum í norðoyggjum, sigur, at hon í sínum arbeiði sær, at børn hava tørv á at seta orð á og fáa eina fatan av, at tey ikki eru einsamøll við teirra truplu kenslum. Tí vónar hon at fleiri fara at gera brúk av hesum tilboði, sum familjufyrisitingin bjóðar.  

Á heimasíðuni hjá familjufyrisitingini stendur, at samrøðubólkarnir hava til endamáls at geva børnum, hvørs foreldur ikki liva saman, høvi at tosa við onnur børn, sum eru í somu støðu og kunnu hava upplivað nógv av tí sama.

Børnini fáa møguleika at seta orð á tankar og kenslur viðvíkjandi skilnaðinum og tilveruni aftan á skilnaðin. Í samrøðubólkinum hoyra børnini søgurnar hjá hvørjum øðrum. Tey verða soleiðis varug við, at onnur børn hava tað eins og tey, skilja betur viðurskiftini í síni egnu familju og føla, at tey ikki eru einsamøll. Tað kann kennast sum ein lætti hjá barninum at tosa um sína støðu. Børnini verða eisini stuðlað, soleiðis at tey verða betri før fyri at handfara svárar støður, avbjóðingar ella viðurskifti, sum fylgja við tí, at foreldrini ikki liva saman.

Til ber at lesa meira um tilboðið á heimasíðuni: famf.fo/samrodubolkar