Byggisamtyktarbroyting, E5

Við heimild í løgtingslóg nr. 13 frá 21. mai 1954 um býarskipanir og byggisamtyktir, sum seinast broytt við løgtingslóg nr. 31 frá 17. mars 2022, verður við hesum boðað frá, at Klaksvíkar býráð samtykti á fundi 24.04.2024 uppskot um at broyta almennu byggisamtyktina fyri Klaksvíkar kommunu.

Uppskotið til broytingina snýr seg um at stovna nýggjan miðstaðar- og bústaðarøkispart, E5. Nýggi økisparturin er uml. 2000 m2 til støddar og er skipaður soleiðis, at veghædd í komandi bygningunum er ætlað til miðstaðarendamál, meðan 1.-2. hædd er ætlað til bústaðarendamál.

Samlaða ábyggingin fyri økið er 60%, minst loyvdu grundøkjavíddir og hæddir eru 500 m2 og 11 m, tó niður 100 m2 og 8 m á útløgdum økjum (skravera). Byggjast kann upp í 2-3 hæddir, og møguligt er at byggja eigara-, luta- og leiguíbúðir. Sí Byggisamtyktarbroyting - Uppskot til økisblað E5.

Kommunan hevur latið gjørt skitsuuppskot fyri ætlaðu bygging á nýggja økispartinum. Útfyllingin skal rúma bygging, so sum sølutorg, almennum vesum, hølir til t.d. útvent virksemi, felagsskapir og bústaðarendamál. Økið verður knýtt saman við bryggjukanti. Sí Skitsuuppskot - Útfylling og bygging til miðstaðar- og bústaðarendamál í Klaksvík - 30.04.2024

Broytingin umfatar sjóøki men markar móti matr.nr. 1658b, 1658a og1648a.

Tilfar, sum lýsir uppskotið um at broyta almennu byggisamtyktina fyri Klaksvíkar kommunu, liggur frammi til alment eftirlit í Miðlan í Klaksvík frá 01.05.2024 – 22.05.2024 og er somuleiðis at síggja á heimasíðu kommununnar: www.klaksvik.fo. 

Møgulig mótmæli ella broytingaruppskot skulu vera Klaksvíkar kommunu í hendi í seinasta lagi 12.06.2024. Tá ið mótmæli ella broytingaruppskot verða latin, viðmerkið málsnr. 23/01320.

Kæruvegleiðing:
Við heimild í løgtingslóg nr. 13 frá 21. mai 1954 um býarskipanir og byggisamtyktir við seinni broytingum og vísandi til almennu lýsingina, dagf. 01.05.2024, um broyting í almennu byggisamtyktini fyri Klaksvíkar kommunu skulu møgulig mótmæli ella broytingaruppskot vera kommununi í hendi í seinasta lagi 12.06.2024. Vísandi til § 6, stk. 2 í somu lóg, verða innkomin mótmæli ella broytingaruppskot, sum býráðið ikki tekur við, send inn saman við uppskotinum, tá
hetta verður sent landsstýrismanninum til góðkenningar.

01.05.2024
Klaksvíkar Býráð