Arbeiðið er nú komið so mikið langt, at søkt verður eftir einum kostfakligum starvsfólki, sum kann samskipa tilgongdina.

Forkvinnan í heilsunevndini, Annika S. Biskopstø, sigur, at uppgávan hjá starvsfólkinum verður at útvega børnum og ungum fjølbroyttan og heilsugóðan mat. Harumframt at taka sær av ymiskum praktiskum og somuleiðis at menna ein mat- og máltíðarpolitikk.

-Eg haldi, at tað er sera umráðandi, at kommunan áhaldandi raðfestir átøk, sum gevur børnum og ungum orku og megi í gerandisdegnum.

-Tað hevur stóran týdning, at børn okkara eta sunt og kenna seg mett og væl sett, tá tey eru í skúla, soleiðis at tey kunnu nýta orkuna til at læra, mennast, hugsavna seg og vera kreativ. Tí gleðist eg um, at heilsunevndin hevur fingið undirtøku at raðfesta eitt átak, sum eg meti eisini viðvirkar til trivnað og menning, samstundis sum tað eisini verður hugsað grønt í mun til gagnnýtslu av mati.

-At hugsa meira umhvørvisvinarligt og burðardygt í mun til matvørur, kann eisini bara viðvirka til, at størri fokus verður á matvørur, sum longu eru og eisini kunnu dyrkast í nærumhvørvinum. Menningin tann vegin styrkir heilt sikkurt eisini felagsskapin og máltíðina, sum somuleiðis er sosialt heilsufremjandi.

-Talan er um eitt nýtt og spennandi starv. Eg síggi góðar møguleikar fyri menning á hesum økinum, tí verður tað spennandi at fylgja gongdini, har kostfakligt starvsfólk saman við øðrum í arbeiðsumhvørvinum, fer at gera hugskot til veruleika, sigur Annika S. Biskopstø, forkvinna í heilsunevndini.

Freistin at søkja starvið er 8. februar. Til ber at lesa meira um starvið her: Kostfakligt starvsfólk og samskipari á Skúlatrøð