Stovnurin, sum lat upp 1. september 2002, byrjaði sum eitt initiativ frá sjálvbodnum og felagsskapum, tí tað var nevndin fyri Ferðavinnuna í Norðoyggjum, sum tók stig til hetta plássið til ferðavinnuendamál og kampingøki. Seinni varð avtalað gjørd við kommununa um nýtslu av hølunum úti í Grøv til útibarnagarð. Í 2012 tá stovnurin hevði 10 ára føðingardag, vóru 35 børn og 8 starvsfólk á stovninum.
Í 2017 vórðu tvær stovur til á leið 20 børn bygdar afturat. Í 2019 vórðu aftur tvær stovur lagdar afturat. Í dag eru á leið 70 børn tilhoyrandi útibarnagarðin við frálíku staðsetingini úti í Grøv.

Meðan børnini vórðu í summarfrí í summar, bleiv elsti bygningurin og spæliplássið tikið niður, tí bygningurin ikki var tíðarhóskandi. Ætlanin er, at spæliplássið skal flytast, og síðan skal ein nýggjur bygningur við trimum stovum gerast. Eftir ætlan skal arbeiðið standa liðugt komandi summar.