Dagføring av Stangavegnum byrjaði í 80´unum, men steðgaði upp, tá kreppan rakti Føroyar í 1992. Seinnu árini hevur lítið verið gjørt við vegin, men fyri nøkrum árum síðani samtykti Klaksvíkar Býráð, at nú skal vegurin gerast liðugur, og hevur býráðið leypandi sett pening av til arbeiðið. Avsetti peningurin, sum í ár er uml. 4 mió. kr., verður brúktur til vegabreiðkan og gongubreyt.

Í hesum døgum verður arbeitt oman fyri Heilsøluna og Borg, har garður verður gjørdur, soleiðis at pláss er fyri gongubreytum á báðum síðum. Vegadeildin fremur arbeiðið og Kanjon hevur stoypt elementir, sum verða brúkt.

Komandi ár eru 3 mió. kr. settar av til parkeringspláss o.a. norðanfyri Garðabrekkuna (vanliga rópt Kongaríkið). Somuleiðis hevur kommunan keypt eini sethús, sum skulu takast niður fyri at flyta vegin (Garðabrekkan) longur norð, so brekkan ikki gerst so brøtt. Hendan ætlanin varð samtykt av býráðnum fyrst í 80´unum, og er síðani tikin fram aftur og samtykt av nýggjum.