Tíðindi
Klaksvíkar kommuna skal hava nýggjan kommunustjóra, og talan er um eitt tignarligt og avbjóðandi starv, sum er leyst at søkja. Kommunustjórin er ovasti umsitingarleiðari í kommununi og hevur ábyrgdina av dagligu leiðsluni og menningini av Klaksvíkar Kommunu og teimum stovnum, ið eru og koma í økinum hjá kommununi. Kommunustjórin skal tryggja at uppgávurnar verða loystar á einum høgum stigi, og at bygnaður og mannagongdir eru í samsvari við nútímans krøv.
Týdningarmiklastu uppgávurnar hjá kommunustjóranum eru at:
- tryggja, at fyrisitingin kann veita politisku skipanini professionella og fakliga ráðgeving á hægsta stigi
- tryggja, at kommunan hevur eina fullgóða fíggjarstýring
- tryggja, at leiðslubólkurin virkar sum ein samskipandi, savnað og strategiskt hugsandi eind
- menna kommununa sum eitt gott og virkið arbeiðspláss við týðiligum virðum, greiðum málum og krøvum um úrslit
- tryggja, at fyrisitingin er før fyri at veita øllum borgarum og vinnulívi í kommununi dygdargóða tænastu og samstarv
- fyrireika og menna kommununa, soleiðis at hon kann taka við teimum avbjóðingum og uppgávum, sum verða lagdar kommununum at umsita í framtíðini
Kommunustjórin hevur eisini hesar ábyrgdir:
- at tryggja, at politiskar avgerðir verða framdar av fullum huga
- at vera næsti ráðgevi hjá býráðnum og borgarstjóranum, herundir ráðgeving innan lóggávu og onnur stýringsamboð
- at hjálpa borgarstjóranum og býráðnum í leiklutinum sum kommununnar umboð í sambondum við borgarar, vinnulív og aðrar viðkomandi partar
- at umboða kommununa í samstørvum, nevndararbeiði v.m. í sambondum við land, kommunur, vinarbýarsambond o.o.
- at tryggja, at kommunan er opin fyri, og at lurtað verður eftir, borgarum, vinnuni, umheiminum og aktuellum kommunalum áhugamálum
- at standa fyri yvirskipaðu leiðsluni av allari organisatiónini og tryggja sjónlig mál og virði á øllum økjum
- at seta í verk nýggja lóggávu, politisk mál og politiskar avgerðir annars
- at tryggja, at fyrisitingin er tilvitað um góðsku og tilfeingi, herundir at hon er sinnað at betra arbeiðshættir
FØRLEIKAKRØV TIL KOMMUNUSTJÓRAN: Umsøkjarar til starvið verða mettir eftir fakligum, leiðsluligum og persónligum førleikum.
Fakligir førleikar:
- viðkomandi útbúgving frá hægri lærustovni ella aðra viðkomandi útbúgving saman við royndum
- kunnleiki til almenna fyrisiting og dugir fyrisitingarliga handverkið
- royndir at arbeiða í einum politiskum umhvørvi
- holl vitan, gott yvirlit og góð analytisk evni, tá ræður um kommunal viðurskifti
- innlit í ella vilja til at seta seg inn í lógir og reglur á kommunala økinum
- hevur kunnleika til kommununa og kommunal viðurskifti
- gott innlit í samfelagsviðurskiftini í Føroyum í breiðum høpi
- hevur viðkomandi leiðsluroyndir og leiðsluvitan íroknað royndir og evni til at leiða
- dugir væl at samskifta og málbera seg á føroyskum í skrift og talu
Leiðsluførleikar:
- Ynskiligt er, at kommunustjórin hevur flestallar av hesum eginleikum. Væntað verður, at tú:
- hevur natúrligan myndugleika og jaligan atburð
- ert ein góður liðleiðari, sum kann fremja gott og jaligt samstarv í leiðslubólkunum
- dugir at býta arbeiðið og at leiða saman við og gjøgnum aðrar leiðarar
- kann seta teg við borðendan, tá ið tørvur er á tí, og torir at taka tær avgerðir, ið skulu takast
- er ein góður ráðgevi hjá borgarstjóranum og politisku skipanini sum heild
- dugir at fremja politiska viljan í verki
- dugir at geva politisku skipanini røttu amboðini at raðfesta við
- ert leiðari fyri allari kommununi og tí sjónlig/ur fyri øllum
- dugir at eggja til nýhugsan
- ert treyst/ur og letur teg ikki lættliga taka av fótum av atfinningum
- dugir væl at lurta. Dugir væl at loysa ósemjur og at vinna tær virðing, men hevur tó virðing fyri ymsu sjónarmiðunum
Persónligir førleikar:
Kommunustjórin hevur í yrkinum nógv samskifti og samtarv við onnur fólk, og tí eru persónligu eginleikarnir týdningarmiklir. Væntað verður, at tú:
- ert jalig/ur og siðilig/ur og vísir øðrum álit og virðing, eisini tá ið hart leikar á
- ert búgvin, hevur humor og spjaðir gott lag kring teg og dámar væl tætt samskifti við politikarar, leiðarar og starvsfólk.
- ert sterk/ur og hevur ró og yvirlit, eisini tá ið støðan gerst torfør, ella tá ið arbeitt verður undir trýsti
- megnar at standa trygt og týðiliga fram mitt í øllum avbjóðingunum
- ert virkisfús/ur og ert týðiliga áhugað/ur
- ert tignarlig/ur og reiðilig/ur og megnar at umboða kommununa á ein góðan hátt
LØN OG SETAN
Starvið verður sett frá 1. juli 2021. Starvið verður lønt í 38. lønarflokki hjá Tænastumannafelag Landsins, tó uttan at verða eitt tænastumannastarv. Harumframt verða 15% goldin í eftirlønargjaldi. Stjórasáttmáli verður gjørdur, og møguleiki er fyri áramálssetan.
UMSÓKN OG UPPLÝSINGAR
Umsóknir við prógvum, c.v. og øðrum viðkomandi skjølum skulu sendast við telduposti til: starv@klaksvik.fo Umsóknirnar verða viðgjørdar í trúnaði, og umsóknir skulu verða Klaksvíkar Kommunu í hendi í seinasta lagi týsdagin 6. apríl 2021 kl. 12:00.
Les meira her: Ískoysti til starvslýsing eftir kommunustjóra til Klaksvíkar kommunu
Áhugaðir umsøkjarar, ið ynskja fleiri upplýsingar um starvið, kunnu seta seg í samband við Karl Haldorsson Johansen, borgarstjóra á tlf. 410000. Víst verður eisini til heimasíðuna hjá Klaksvíkar kommunu: www.klaksvik.fo.