Nýggjastu tíðindi

14/04/2021

Fullsett til fyrilestur um rúsevnismisnýtslu millum ung


Hølini í Soli Deo Gloria vóru fullsett av áhoyrarum týskvøldið, har viðgerðarstovnurin Frælsi, í samstarvi við Soli Deo Gloria og Klaksvíkar kommunu, skipaði fyri kunnandi fyrilestri, sum Erling Fles, løggildur sálarfrøðingur, hevði.

Endamálið við tiltakinum var at upplýsa um, hvussu vit kunnu fyribyrgja rúsevninsmisnýtslu, og hvørji eyðkenni ein skal vera varugur við, og at geva foreldrum, avvarðandi, starvsfólkum og umsorganarpersónum amboð til at hjálpa ungum, sum eru blivin bundin at rúsevnum.

Hallgerð Akurstein, leiðari fyri Soli Deo Gloria, beyð vælkomið og greiddi frá skránni, og gav síðan orðið til Erling Fles, ið arbeiðir sum sálarfrøðingur fyri viðgerðarstovnin Frælsi. Fyrilesturin, sum var ókeypis, hevði vakt stóran áhuga millum manna, tí rúmligu hølini vóru fullsett av áhoyrarum, og eftir fyrilesturin vórðu nógvir spurningar settir og fólk skiftu orð um evnið.

Umframt Erling Fles vóru eisini onnur starvsfólk hjá Frælsi við til tiltakið og vóru tøk til spurningar og prát, og eisini greiddi Heidi Tvørfoss, starvsfólk hjá Frælsi, frá teimum skeiðum, sum Frælsi bjóðar familjum.

Aftaná bjóðaði Soli Deo gloria kaffi og køkur í hugnaligu matstovuni við útsýni yvir vágna í Klaksvík, har luttakararnir fingu høvi til at práta víðari saman.

Eitt væl eydnað tiltak, sum staðfesti, at stórur áhugi er fyri hesum týdningarmikla evni. 

Nýtt í kommununi

Børnini vóru við tá barnagarðurin varð reistur
11/06/2021

Seinnapartin í dag bleiv nýggi barnagarðurin á Norðoyri reistur. Spakin varð settur í 26. Mars, og nú, góðar tveir mánaðir eftir,… Les meira »

Reingerðarfólk til nýggja dagstovnin á Norðoyri
11/06/2021

Klaksvíkar kommuna søkir eftir reingerðarfólkið til nýggja dagstovnin á Norðoyri, ið hoyrir til Barnahúsið Margit, at byrja 2. aug… Les meira »

Forskúlaálit handað kommununi
11/06/2021

Í mars mánað samtykti Klaksvíkar býráð at seta ein arbeiðsbólk at lýsa møguleikar og kanna fyrimunir og vansar við at skipa ein fo… Les meira »

Vís fleiri