Nýggjastu tíðindi

04/05/2021

Virkið vár


Í tíðarskeiðinum 8. mai til 5. juni setur Klaksvíkar kommuna umhvørvið og fólkaheilsuna á breddan. Býurin skal vera karmur um størri og smærri átøk, sum skulu eggja borgarum at brúka býrúmið og náttúruna.

Klaksvíkar kommuna er samstarvspartur hjá Fólkaheilsuráðnum, sum stendur fyri átakinum ABC fyri sálarheilsu. Eisini hevur Klaksvíkar kommuna seinastu árini við átakinum Slóða fyri, sett umhvørvið á breddan. Undir heitinum Virkið vár verður við hesum báðum átøkunum varpað ljós á kropsliga og sálarliga heilsu, samstundis sum lagt verður upp til, at borgarar brúka náttúruna og harvið fáa upplivingar, sum kunnu eggja til góðar útivanar.   

Annika S. Biskopstø, forkvinna í heilsunevndini, sigur, at hetta er fyrsta átakið hjá nýggju heilsunevndini, sum hevur til endamáls at eggja og seta í verk tiltøk til frama fyri betur heilsu- og umhvørvisviðurskiftum.

- At vera virkin uttandura í okkara býi, bygdum og náttúru gagnar okkum øllum væl. Vit kenna øll, hvussu væl vit eru fyri, tá vit hava rokast úti og fara glað og troytt til songar. Ella tá vit hava verið úti og notið friðin, luftina og vakra útsýnið við eru umringað av.   

- Í sambandi við Virkið vár, hava vit millum annað bjóðað stovnum, áhugafeløgum og øðrum at taka lut við ymiskum tiltøkum, sum eggja til, at vit kunnu vera saman, virkin og hugbundin m.a. úti í náttúruni. Í hesum sambandi kann eg m.a. nevna, at skipað verður fyri einum familjutúri í Halgadal, har familjur kunnu fara ein gongutúr og njóta náttúruna og síggja smálombini, sum eru komin, og seinni verður eisini møguleiki hjá barnagarðsbørnum at planta trø í býarrúminum, sigur Annika S. Biskopstø.

Leygardagin 8. mai verður Virkið vár skotið í gongd. Hendan dagin skipar Treysti eisini fyri NS hálvmaraton, og í tí sambandi verða Stoyksoyravegur, Klaksvíksvegur, Biskupstøðgøta Nólsoyar Pálsgøta og partur av Stangavegnum stongd fyri ferðslu, men lagt verður upp til hugnaliga samveru kring rutuna, tá ið runnið verður. Kommunan setur benkur og fløgg upp ymsastaðni, og eggjar fólki at fara út at njóta friðin á vegunum, hugna sær á einum bonki, hoppa band, lakka paradís ella eitt hvørt annað, sum stuðlar undir hugnaliga samveru.

Skráin fyri Virkið vár leygardagin 8. mai er tøk niðast á síðuni her. Sum mánaðurin líður, koma onnur tiltøk eisini á skrá. Serliga vera tað leygardagarnir fram til 5. juni, at ymiskt verður á skrá. Til ber at fylgja við á facebook-tiltakinum Virkið vár og á heimasíðuni hjá Klaksvíkar kommunu.  

Forkvinnan í heilsunevndini sigur til seinast, at hugskot til skránna framvegis eru vælkomin, tí eitt av endamálunum við hesum átakinum er nevnliga at sjónligera tiltøk og átøk, sum longu eru á skrá hjá áhugafeløgum, einstaklingum og øðrum. Á hendan hátt fáa vit sum kommuna verið við til at varpað ljós á tiltøk, sum eru heilsu- og umhvørvisfremjandi, sigur Annika S. Biskopstø.

Kunning um tiltøk, sum eru heilsu- og umhvørvisfremjandi, og sum eru á skrá í tíðarskeiðinum 8. mai til 5. juni, kunnu sendast til Duritu Samuelsen umvegis duritas@klaksvik.fo.

 

Skráin 8. mai 2021

Kl. 10:00 Annika S. Biskopstø, forkvinna í heilsunevndini, setur Virkið vár. Setanin verður á terassuni og skúlagarðinum ímóti SnjalluBjallu

Kl. 10:10 Skótarnir seta smáskótadagin og skipa fyri sangi og spæli. Øll eru vælkomin

Kl. 10:30 Monika Mohr frá ABC fyri sálarheilsu hevur framløgu um ABC fyri sálarliga heilsu

Kl. 11:15 Sangframførsla við Onnu Louisu Mýri

Kl. 11:30 Fólkaheilsuráðið skipar fyri ókeypis heilsukanningum, har møguleiki er at máta BMI, vøddar og feittprosent. Kanningar eru, so leingi áhugi er. Møguleiki er fyri uppfylgjandi heilsukanning 2.juni.
Nærri kunning seinni.

Kl.11:30 Tekniborði, har tað er møguligt hjá børnum í øllum aldri at gera eina tekning til listaframsýning, har evnið er “Mítt býarrúm”. Tekningarnar hanga uppi á Skúlatrøð til og við á norðoyastevnu

Kl.11:30 Bóndir og Norðoya Kunningarstova greiða frá virkseminum viðv. matsølu í smáttunum og bóndir bjóða brellbitar

Kaffi, te og vatn verður at fáa.

Kl.13:00-17:00 Ferðsluavmarkingar í samband við NS hálvmaraton.
Kommunan eggjar fólki at fara út at njóta friðin á vegunum og stuðla rennarunum, hugna sær á einum bonki, hoppa band ella lakka paradís.

Kl. 13.30 Treysti skipar fyri barnarenning í samband við hálvmaraton. Startur og mál uttanfyri Norðoya Sparikassa. Tilmelding í seinasta lagi 7. mai

Kl. 14.00 FM hálvmaraton, NS hálvmaraton og NS stuðulsrenning. Startur og mál uttanfyri Norðoya Sparikassa. Tilmelding í seinasta lagi 7. mai

Kl. 15.00 Norðoya gongufelag skipar fyri familjutúri í Halgadal undir Brúnaskarið, har møguligt er at uppliva náttúru og smálomb. Vit hittast við reyða fjósið, har rulluportrið er. Ver í gummistilvum.

Kl. 15:15 Smáskótarnir hittast um legubál á Vágsbøi. Øll eru vælkomin at luttaka í sangi rundanum bálið.

Sí skránna í pdf her: Virkð Vár

Nýtt í kommununi

Børnini vóru við tá barnagarðurin varð reistur
11/06/2021

Seinnapartin í dag bleiv nýggi barnagarðurin á Norðoyri reistur. Spakin varð settur í 26. Mars, og nú, góðar tveir mánaðir eftir,… Les meira »

Reingerðarfólk til nýggja dagstovnin á Norðoyri
11/06/2021

Klaksvíkar kommuna søkir eftir reingerðarfólkið til nýggja dagstovnin á Norðoyri, ið hoyrir til Barnahúsið Margit, at byrja 2. aug… Les meira »

Forskúlaálit handað kommununi
11/06/2021

Í mars mánað samtykti Klaksvíkar býráð at seta ein arbeiðsbólk at lýsa møguleikar og kanna fyrimunir og vansar við at skipa ein fo… Les meira »

Vís fleiri