Tíðindi

13.10.2021
Mentanarhúsið í Klaksvík skal hava navn

Hevur tú eitt gott hugskot um navn, sum fellur væl og annars er hóskandi, send so inn.

Mentanarhúsið, sum hevur verið eitt arbeiðsheitið, er gamla Posthúsið, ið bygt varð í 1967 og ein stór høll, verður bygd aftuat.

Húsið skal eftir ætlan standa liðugt komandi summar, har tað kunnu sita 380 fólk inni í høllini. Tað er Grunnurin, Mentanarhús í Klaksvík, sum eigur, byggir og skal reka húsið.

Endamálið við húsinum er at vera karmur um mentanarliga virksemið í býnum, við sjónleik, kvøldsetum, upplestri, sangi, tónleiki, fundum, framsýningum, ráðstevnum og ymiskum øðrum.

Dentur verður lagdur á, at virksemið verður so fjølbroytt sum gjørligt, og at virksemið tekur støði í føroyskum mentanararvi, í tí mentan her býr og við tign, sum sømir seg einum mentaðum fólki.

 

Bygningurin er ikoniskur í skapi og brúki og kann lata endaveggin á pallinum upp oman móti og Vágsbøi.

Høllin hevur í skapi verið kallað eitt “tíðarbrot” – brot úr klokkuni. Ein steinur ella skrín, ið liggur í lendinum, sum letur seg upp í myrkrinum, har alskyns leikur spretta úr og spæl er inni har.

Í bygninginum, har umframt stóru høllina eisini er ein kafé, smærri spælistøð, verkstøð, skrivstovur, framsýningarstøð og ein býarsalur, skulu øll kenna seg væl og vera vælkomin – ein spennandi bygningur við einum vøkrum navni, sum tú setur á.

 

Soleiðis luttekur tú:
Uppskotið skal latast inn í tveimum aftulatnum brævbjálvum:

• Ein brævbjálvi við uppskotinum sjálvum saman við frágreiðing um hugskotið og grundgeving fyri, hví tú velur hetta heitið ella navnið. Merk brævbjálvan “Navnakapping Mentanarhúsið”.

• Ein brævbjálvi við uppskotinum sjálvum saman við navni á uppskotsstillara. Hetta fyri at nevndin ikki skal síggja navnið á viðkomandi undir viðgerðini. Merk brævbjálvan ”Luttakari og uppskot”.

 

Uppskot skulu sendast til: 

Grunnur, Mentanarhús í Klaksvík

Nólsoyar Pálsgøta 32

Postsmoga 2

FO-710 Klaksvík 

og verða grunninum í hendi í seinasta lagi 3. november 2021 kl. 12:00.

 

Dómsnevndini, sum endaliga velur navnið, er stýrið fyri Grunnur, Mentanarhús í Klaksvík.

Stýrið skilar sær rætt til frítt at velja millum innkomnu uppskotini.

Vinnarin fær í virðislønin fyri vinnandi uppskotið kr. 10.000,-

Spurningar kunnu stílast til dw@klaksvik.fo 

Grunnur, Mentanarhús í Klaksvík

Onnur tíðindi
24.04.2024

Nýhugsandi innbúgv til Klaksvíkar Býráð

24.04.2024

Býráðsskrivstovan stongt flaggdagin

23.04.2024

Flaggdagshald í Vágstúni

23.04.2024

Bjóðað verður til almennan fund í Svínoy