Nýggjastu tíðindi

24/07/2018

Myndir: Lundin bjóðar til vakurleika og frið í miðbýnum


Arbeiðið við fyrsta parti av býarlundini við Akursmørk á ovara Vágsbøi er so gott sum liðugt, og longu nú ber til at njóta friðsæla grøna umhvørvið mitt í býarhjartanum.

Arbeiðsfólkini hjá Kanjon eru so at siga liðug við sítt arbeiði í lundini, sum er opin og fríð hjá øllum at vitja og brúka. Tað einasta, sum nú er eftir hjá teimum at gera, at er at seta eina brúgv upp tvørturum Ósánna, og hetta verður gjørt eftir Summarfestivalin, sum er á skránni um góðar tvær vikur.

Býargartnarin og hansara toymi hava somuleiðis syrgt fyri, at trø, runnar og annar grønur vøkstur eru gróðursett í lundini, og hesi fara at økja um vakurleikan so hvørt, sum tey grønkast og vaksa, men longu nú er lekkurt og hugnaligt at ganga á snøggu gøtunum í lundini, og til ber eisini at seta seg á benkurnar og njóta útsýnið tvørturum bøin og yvir ímóti Vágstúni, sum eisini er fríðkað nógv.

Býarlundin er liður í ætlanini hjá Býráðnum um, at Klaksvík sum heild skal gerast vakrari. Hendan ætlanin gongur aftur gjøgnum eitt nú grøn øki sum til dømis lundina, men skal somuleiðis eisini síggjast í byggiverkætlanum og vanligum viðlíkahaldsarbeiði sum til dømis veg- og asfalteringsarbeiði. Í summar hevur eisini verið arbeitt við at fríðka um býin við sokallaðum Street Art í Skýlinum við Djúpumýru, sum um dagarnar verður listprýtt, og hetta er somuleiðis við til at gera býin og kommununa sum heild vakrari. 

Nýtt í kommununi

Hjálparfólk til Dr. Margrethu barnagarð
17/09/2021

Vit søkja eftir avloysar fyri hjálparfólk í farloyvi. Talan er um eitt tíðavmarkað starv frá 1. oktober 2021 til 31. desember 2021… Les meira »

Arbeitt verður við bústaði til 44 arbeiðsfólk
15/09/2021

Í sambandi við at arbeiðið við tunlunum ”norður um fjall” nú fer í gongd, so hevur Articon vent sær til kommununa um at útvega eit… Les meira »

Klaksvíkar kommuna við í átakinum Rudda Føroyar
14/09/2021

Í døgunum 11.-18. september fara vit at rudda í kommununi í sambandi við árliga ruddingarátakið Rudda Føroyar. Í hesum sambandi ve… Les meira »

Vís fleiri