Nýggjastu tíðindi

11/09/2020

Kappróðrarneystið verður nú veruleiki


Sáttmálin um bygging av nýggjum kappróðrarneysti varð undirskrivaður á móttøku í Biskupstorgi í gjár. Til hátíðarhaldið vóru umboð frá kommununi, arbeiðstakaranum og nevndin hjá kappróðrarfelagnum. Tað er Malltek, sum er høvuðsarbeiðstakari.

Verkætlanin er ment í tøttum samstarvi millum Klaksvíkar Róðrarfelag, Klaksvíkar býráð og Henning Larsen arkitektar, sum eisini hava staðið fyri miðbýarverkætlanini. Tískil fellur nýggi bygningurin sera væl inn í miðbýarmyndina. Íblásturin til nýggja neystið tekur fyrst og fremst støði í kappróðrinum, men eisini í umhvørvinum, soleiðis at siðbundna úttrykkið við neystalonum verður varðveitt og nútíðargjørt.

Jógvan Skorheim, borgarstjóri, fegnast um, at verkætlanin er komin somikið lagt, at byggingin nú kann fara í gongd, soleiðis at kappróðrarfelagið kann fáa nýggj prýðilig hølir, mitt í hjartanum í býnum.

Nevndin í kappróðrarfelagnum var væl umboðað til hátíðarhaldið í gjár, og gleðast tey um, at glið nú er komið á verkætlanina.

-    Virksemi er í neystinum mestsum hvønn dag í árinum, so fyri okkum í KRF hava góðir karmar alstóran týdning. Eisini hevur tað týdning, at okkara bátar hava góðar umstøður, so at teir eru góðir kappróðrarbátar. So vit gleðast sjálvsagt um at fáa eitt nútímans neyst at virka í, sigur Sonja Kjølbro, forkvinna í Klaksvíkar Róðrarfelag

Tað var annars eitt samt býráð, sum í fíggjarætlanini setti 7 mió. kr. av til at gera eitt nýtt neyst til kappróðrarfelagið. Fyrsta stig í verkætlanini er, at Kanjon skal gera útfyllingina, har neystið skal standa liðugt, og stutt eftir hetta verður farið undir at byggja nýggja kappróðrarneystið. 

Nýtt í kommununi

Jórun Niclasen vann navnakappingina
18/09/2020

Í juli flutti trivnaðardeildin Børn og Ung í húsið á Fornagørðum. Hesaferð í miðhæddina. Í tí sambandi høvdu starvsfólkini eina i… Les meira »

Studentaflokkur vitjaði borgarstjóran
16/09/2020

Fyrrapartin í dag vóru næmingar frá norðuratlantiska studentaflokkinum, sum hetta hálva árið heldur til á Kambsdali, og vitjaðu Kl… Les meira »

Skrúvað verður fyri vatninum
13/09/2020

Vegna brot á vatnleiðing verður skrúvað fyri vatninum til Garðsenda, Bumshamarsveg, Torvgøtu og Stoksoyraveg frá mánadegnum 14. se… Les meira »

Vís fleiri