Tíðindi
Tó at tað regnaði nakað illa seinnapartin í gjár, møtti væl av fólki til minningarhaldið teirra sjólátnu, sum var í gamla kirkjugarði við Vágstún.
Skráin var henda:
Jóhanna C. Christiansen, forkvinna í Mentanarnevndini beyð vælkomin og greiddi frá skránni. Síðani sang eitt væl samansungið manskór úr Betesda; Bjart várs Faðirs náði skínur, áðrenn Heri Joensen, prestur, flutti fram minningarrøðuna, varð felagssangur, Breið tínar náðiveingir, sungin.
Við sorgblídni, virðing og tøkk vórðu nøvn teirra, ið franir eru, nevnd:
Tann 21. november doyði Jóhan Petur Suni Olsen, 56 ára gamal. Hann sigldi við skipinum Hav- Nordlandia, ið lá við bryggju í Miðvági. Hann var búsitandi á Strondum.
Tann 22. februar druknaði Petur Johansen við aliringarnar í Miðvági, 52 ára gamal. Hann búði í Miðvági.
Tann 13. februar doyði pólendingurin Maciej Krzysztof Broniszewski umborð á Suðringi undir fiskiskapi undir Føroyum, 48 ára gamal. Hann var búsitandi í Froðba.
Tann 18. juni druknaði Karl Sofus Lamhauge Garðalíð við Vestaru bryggju í Havn, 59 ára gamal. Hann var ávegis umborð á Túgvustein, ið lá við bryggju. Hann búði í Vestmanna.
Kransar:
Klaksvíkar Býráð: Karl H. Johansen, borgarstjóri
Føroya Landsstýri: Árni Skaale, landsstýrismaður
Klaksvíkar Útróðrarfelag: Jógvan Páll Steinberg, formaður
Klaksvíkar Arbeiðskvinnufelag: Jastrid W. Niclasen, forkvinna
Klaksvíkar Arbeiðsmannafelag: Absalon Hansen, formaður
Manskórið úr Betesda sang síðani, Á lívshavsins bylgjum og síðani at enda felagssangurin, Ja, sig honum takk.
At enda takkaði Jóhanna C. Christiansen, forkvinna í Mentanarnevndini fyri og beyð til drekkamunn í Betesda.